美味天使的「柑桔」陳蕊蕊、「香蕉」王淑玲、「藍莓」劉俐與「蜜瓜」關婉珊日前齊集在荃灣拜四面佛。雖然當日氣溫只是約十度，但她們仍脫去外套騷出長腿！身穿小背心及超迷你裙的陳蕊蕊最性感，反觀劉俐則最密實，難怪她即時嘴扁扁地說：「我着到黑沉沉咁，希望四面佛都留意到我啦！」她們不清楚拜佛的方向，要勞煩佛寺的工作人員提點，最後依足前輩狄波拉的一貫逆時針拜佛方法祈福，王淑玲說：「舊年9月喺泰國拜過，之前係順時針咁拜，但今次係逆時針。」

陳蕊蕊無懼寒風，身穿性感衣着拜四面佛。	王淑玲誠心跪拜，希望可以順利出碟及遠離是非。	美味天使的出現吸引不少目光，有檔主更送上幸運手繩給關婉珊。

陳蕊蕊積極作歌

她們如此誠心求神，全為保祐新碟順利推出，王淑玲說：「我哋四個嚟緊會出碟，希望可以快啲成事，好嘅嘢接踵而來，唔好嘅嘢就遠離我哋。」陳蕊蕊表示現正積極創作歌曲：「希望可以寫多啲好歌，依家寫咗隻快歌，係圍繞青春少艾嘅諗法，關婉珊就寫咗首慢歌。」劉俐與關婉珊也希望工作先行，愛情其次，劉俐還多謝監製錢國偉的賞識：「好多謝有『美味天使』呢個身份，雖然少咗同家人、朋友相處，但學咗好多嘢！」