日本通王友良近年都算出位，日模椋名凜同有亞洲版Beyonce之稱嘅劉晨芝經佢力捧下，喺香港人氣急升，捧人有一手嘅佢，最近同日本公司K-Dash傾合作。而曾經做過歌手嘅王友良，好大機會同K-Dash簽歌手合約，有望喺日本出碟。K-Dash一直同諸葛亮後人諸葛梓岐傾約，若事成嘅話，王友良同諸葛梓岐大有機會做同門師兄妹。
小小So：估唔到你對樂壇仲咁有熱誠！
王友良：我太鍾意唱歌喇！之前送畀朋友嘅聖誕卡，都夾咗一張自己唱聖誕歌嘅碟喺入面，我唔想放棄，呢個係我嘅夢想。
小小So：唱歌賺錢多，定係做代理人賺錢多？
王友良：應該話唱歌賺錢快過做生意，好似聖誕節期間我就接咗八場騷。
小小So： 日本做歌手好咩？
王友良：日本人好肯花錢，我要求都幾高！
小小So：將來咪少咗時間喺香港？
王友良：都係！將來喺日本時間多啲，所以香港呢邊都要請多幾位助手幫手。