亞視股權變動未成，電視台內四大部門已翻天覆地，高級副總裁（製作）鄭偉強即日起將統領藝員部、製作、行政及音樂部門。繼《亞洲星光大道》成功引入香港後，鄭偉強有樣學樣，連制度都行台灣制，先是開放藝人上其他電視台，但合約形式改為一騷計，甚至零底薪，變相減人工！儘管他聲稱藝員合約到期會再斟洽，但再合作形式將會轉為「部頭式」，冇底薪冇福利，新人如亞姐等更是零底薪。
剛續新約的「影后」鮑起靜，對公司新制度感到涼薄：「公司上軌道有嘢拍就冇所謂，但喺唔穩定嘅情況下，要養家嘅同事就好慘！」林韋辰及筱靖等昨日聯同逾二十名藝員返亞視開會，阿辰信心十足：「我個人就冇問題，主持緊《財神到》，有信心每月有五位數字人工。」而筱靖演出兩個新節目，暫時不擔心：「打份工都要生存到，續約時睇咩環境再決定。」另外，鮑姐昨日出席長者活動時表示，有留意亞視股東的爭拗，她希望有新財團投資，可令同事有信心及安心留低，但她沒有考慮跳槽：「冇動搖過，做咗咁多年有個情意結。」