小小So喺娛圈打滾十幾年，見過唔少未紅先驕嘅藝人，同時亦見過好有修養同有禮貌嘅藝人。其實做得藝人，最緊要明白「食得鹹魚抵得渴」同「睇化」呢兩個道理，明白依家做新人比較吃力，機會唔多不特止，仲要面對好多挑戰同困難，小小So都戥佢哋心痛！好似吳雨霏（Kary）咁，由Cookies年代開始，小小So已經睇好佢，只係欠缺機會同運氣。小小So早排應邀欣賞《新城勁爆頒獎禮》，見到Kary一口氣掃三獎，忍唔住讚佢叻女。雖然大家都覺得新城係派獎，但獎項對歌手嚟講的確係一大鼓勵。當日Kary仲轉咗新形象，雖然小小So唔多鍾意嫌太浮誇，但佢話作為藝人應該試吓唔同造型，仲承諾會繼續努力，小小So祝佢歌唱事業大紅大紫！