港姐出身的楊思琦可謂「禍不單行」，入行多年經常受傷，當年她代表香港參選華裔小姐時不幸遇上意外，至今仍猶有餘悸，她說：「我哋成班女仔去咗番禺拍外景，突然有隻駱駝撞過嚟，條頸受咗傷，雖然好痛，但希望完成整個賽事，攞唔到冠軍都唔緊要。」

思琦撞斷手指骨，痛到入心。	思琦為台慶排練而撞傷，戴上頸箍表演。	楊思琦拍劇經常撞至周身傷 。

入行前，思琦是家人的掌上明珠，得到父母愛錫，從來不用做苦工，至正式加入娛樂圈後，卻因拍劇經常捱更抵夜，又要像「武林高手」一樣，上高山落冰水，04年她拍攝《血薦軒轅》時發生意外，被臨時演員強拉落馬，跌傷尾龍骨，她說：「因為收音咪啱啱喺尾龍骨位置，跌落地嗰陣又撞到石頭，當時痛到郁唔到，擔心呢世都係咁。」

獲認同抵番晒

思琦雖然不是「舞」林高手，但勝在體態嬌美，經常在無綫的大型節目中表演跳舞，06年台慶，她因表演高難度動作而撞傷頭及頸，又在《舞動奇跡》中意外撞斷手指骨，她肉緊地說：「我終於明白咩叫十指痛歸心，當時為《舞動》排練，因為練習場地嘅樓底天花太矮，舞蹈員抬起我時，伸手就撞向天花，搞到手指骨裂咗，痛到面都青埋，冷汗直標，嗰種痛真係由心痛出嚟。」

思琦捱過不少苦，連父母亦非常擔心，但她認為很值得：「意外真係冇人想，但每次演出其實都有得益，好似《舞動》就畀機會令更多中國人認識我，最記得有次行街時，有位來自黑龍江嘅遊客話睇過我嘅節目，搵我合照同簽名，真係好開心。」

唔敢睇相

思琦多年來屢遇意外，被取笑身手太差，她解釋：「以前拍《無名天使》時有好多打鬥場面，但都冇事，所以我諗係同流年有關！」不過，思琦沒有看過相士批運程，她笑說：「我好細膽，怕聽到唔好嘅會唔開心，惟有逆來順受。」