愛靚係女人天性，尤其係女藝人，為咗出鏡瘦啲靚啲，可謂各出奇謀，最近圈中「勁」流行一種水果減肥法，傳聞話可以一個星期減幾磅，屬「肥底」嘅樂壇女新人麥家瑜（Keeva）就親身試過，試飲四日就成個人瘦晒，不過佢以「過來人」身份呼籲要量力而為，切勿要靚唔要命。
小小So：聽講你有個好有效嘅減肥方法喎？
Keeva：係呀！有朋友教我水果減肥法，每朝空肚飲蘋果苦瓜汁，蘋果一個加半條去核苦瓜榨汁飲。
小小So：有幾有效呀？
Keeva：我飲咗四日真係瘦到，經理人都問我做乜瘦咗咁多，呢個方法勝在健康，因苦瓜可以排毒清熱去水腫。
小小So：咁有乜要注意㗎？
Keeva：因為苦瓜偏涼，我飲咗四日就覺得唔係好夠氣，同面色麻麻哋，又多手汗同個人覺得好攰。睇中醫話我體質太虛，所以我都停咗。我提議如果啲女仔喺月經時就要停飲，怕虛上加虛，減肥都要視乎體質。
小小So：仲有乜又平又簡單嘅減肥餐呀？
Keeva：有朋友教我飲有氣水，但因為我唔鍾意，所以冇試過。