衣着講究迎合潮流

問：有冇特別貪靚嘅地方？

答：有，衣着方面我比較講究，亦會因應唔同場合着唔同嘅衫，而且我亦好留意潮流嘅改變。

解碼：所謂人靠衣裝，欠缺一張俊臉的張繼聰，惟有靠衣着突出自己，品味加氣質都會營造出一份魅力。

問：有冇試過食蛋白粉增生肌肉？想唔想做大隻佬？

答：有試過，我諗每一個男士都想擁有健碩身形，着衫都好睇啲。

解碼：既然先天不足，當然要後天補救，張繼聰深明呢個道理，梗係要努力增加外表嘅吸引力。

注重儀容護膚有道

問：覺得男人做Facial有冇問題？

答：當然冇問題，因為現今有好多男士都比較注重儀容，而且做Facial亦是清潔一部分，所以唔覺得有問題。

解碼：張繼聰身為某男士護膚品牌的代言人，當然賣花讚花香，加上藝人呢個身份，更加要注意外表。

問：鍾唔鍾意太太幫你唧暗瘡？

答：好討厭！因為呢個動作好私人，咁做又唔清潔，我唔鍾意將唔好嘅嘢要太太幫我處理。

解碼：睇得出張繼聰真係好愛錫太太，不過通常冇乜男人鍾意女友或太太唧暗瘡，佢哋情願唔理。

處事節制分寸十足

問：有冇試過因為打機幾日幾夜冇瞓覺又冇食嘢？

答：冇，我係個好有節制嘅人，就算點鍾意打機，都唔會唔食唔瞓影響工作。

解碼：一個有節制嘅人，通常EQ都一定高，識得控制自己唔可以做過分嘅事，做人處事都有分寸。