古天樂昨日與鄭中基及黃百鳴到旺角行人專用區宣傳新片《花田囍事2010》，古仔按大會指示將繡球拋落台，選出觀眾上台攞禮物，但鄭中基及黃百鳴卻搞笑地說：「禮物就係錫古仔一啖。」古仔聞言即反擊：「男仔攞到繡球就錫鄭中基。」雖然繡球最後落在女觀眾手中，但該女觀眾卻害羞得主動提議與古仔握手代替錫錫。

鄭中基（左起）、古仔及黃百鳴殺落旺角宣傳新片，吸引大批市民圍觀。	有幸上台的觀眾因怕醜，不敢錫錫古仔。	鄭中基揚言接到繡球的幸運兒可錫古仔一啖。

鄭中基未賀阿Sa攞獎

古仔事後表示不覺尷尬：「有咩好驚？頂多咪錫！我有成十年冇落過旺角，今日場面幾熱鬧吖！好配合我哋套賀歲片，黃百鳴老闆對套戲票房有信心，我都一樣有信心。（年初一情人節有乜節目？）冇乜特別節目，留喺屋企拜年。」

鄭中基則自稱比古仔厲害，他說：「我冇嚟旺角三個零月左右，我成日落嚟旺角睇模型槍o架！唔使喬裝，因為我去慣去熟，啲人見到我就問：『喂，去邊呀？』（情人節年初一點過？）屋企人去旅行，我會留守屋企等人上嚟拜年。（有冇祝賀阿Sa《勁歌》攞獎？）錄低咗未睇，會祝賀佢，但未打電話畀佢。」

黃百鳴則表示《花》片有力破去年港產片票房冠軍《家有囍事2009》紀錄：「到時要睇《阿凡達》嘅已經睇得七七八八，新年應該一家大細開心吓，我哋連鏹水都唔驚，特登揀最旺嘅地方宣傳。」