樂壇天后容祖兒是公認的唱得之人，而且出道10年身材都Keep得好好，唔見佢有肥過，近排祖兒忙緊頒獎禮，又要為將舉行嘅演唱會排舞，工作忙個不停，自然要食少啲保持最佳狀態。小小So早排見到祖兒，先知原來佢有獨特嘅減肥配方。
小小So︰祖兒你喺頒獎禮套衫好靚呀，身材Keep得好好，有咩秘訣？
祖 兒︰邊係呢！雖然就開演唱會，但我都冇刻意節食，仲會食消夜㗎！
小小So︰吓！你食咩做消夜㗎！乜你唔怕肥咩？
祖 兒︰我平時夜晚肚餓都會食一碟芥蘭，因為蔬菜有益，又冇脂肪，又可以醫肚，咁健康點會肥呀！
小小So︰噢！唔怪得你咁苗條，Keep得咁好啦！
小小So真係好佩服祖兒食得有腦，大多數藝人開演唱會之前都選擇戒食消夜，因為怕肥，怕有豬腩肉唔好睇，但祖兒一於少理繼續食消夜。小小So下次見到祖兒一定會再追問一下佢嘅飲食配方，乘機偷吓師。