前日榮升爹哋的林文龍，昨日到中半山嘉諾撒醫院探望老婆郭可盈及7.2磅重的女兒，期間他特意落樓接受記者訪問，提到囡囡，他難掩初為人父的喜悅：「囡囡仲未改名，但心水字有好多，不過未有一個滿意，會搵相士畀意見，慢慢研究。（點獎勵可盈？）未生之前已經成日獎勵佢啦！我呢世仔都未收過咁大份禮物，個女臨出世前一晚，可盈話佗咗佢九個幾月，好唔捨得BB離開佢個肚。我見到個女出世時好感動，感覺到我、太太、囡囡係三位一體，冇嘢比BB更重要！」

初為人父的林文龍學習抱BB，似模似樣。	阿B與女兒鍾懿到醫院探望范姜及BB女。	放大圖片

范姜落床餵人奶

文龍揚言要做「愛妻號」：「呢兩個月我都唔接劇住，要抽多啲時間陪吓可盈，始終我哋兩個都係新手父母，唔熟習點樣湊BB。（幾時追番個仔？）睇可盈康復狀況，佢進度好好，我都希望遲啲生夠兩個！（個女似爹哋定媽咪？）有人話BB女對眼同個鼻似我，嘴就似媽咪。（睇咗個女幾多次？）我都數唔到，尋日又有睇，今日又有睇，幾乎無時無刻都想望實佢，可盈生BB咁辛苦，獎乜都得啦！」

此外，鍾鎮濤（阿B）昨日與女兒鍾懿到養和醫院探望范姜及新生女兒，阿B出入多次，講起囡囡均十分雀躍：「范姜依家可以落地，但因為要餵人奶，要注意飲食，囡囡未改名，會搵相士幫手。我同鍾懿合唱嗰隻歌，遲啲會拍MV留作紀念。」