四大唱片公司與無綫關係決裂，《2009年度十大勁歌金曲頒獎典禮》今晚舉行，但四大公司批准旗下歌手以廣東話接受無綫以外的電視台訪問，彼此關係火上加油！張敬軒前晚舉行經理人公司成立晚宴，無綫高層陳志雲及樂易玲到賀，但當晚他成為第一個四大歌手，破天荒以廣東話接受現場有線電視台訪問。其後，軒仔有感處理問題失當，昨日凌晨在Blog中公開道歉：「我衷心感激陳志雲先生、樂易玲小姐、以及幾位TVB的前輩，在百忙之中，更在這敏感時期，以私人身份，抽空前來支持、見證。但我為我今晚在接受媒體採訪後，給各位前輩所帶來的困擾，感到內疚和自責。我以粵語答記者問，也是跟隨公司決策，事在必行，但其實偏偏就不應該是今晚。」
陳志雲勸勿內疚
對於軒仔公開道歉，而「四大」歌手仍以廣東話接受有線訪問，無綫製作資源總監樂易玲說：「唔想回應，係公司同公司之間嘅問題，我唔想歌手為難。」而被指視軒仔成為「愛將」的無綫總經理陳志雲說：「今日一早收到軒仔一封好長嘅道歉SMS，內容同佢嘅網誌差唔多，佢話好唔開心，我覆番一封好長嘅SMS，話我哋明白事理，叫佢唔好自責同自疚。只係兩個機構為自己爭取利益，叫佢唔好唔開心，但佢一向比較敏感，好怕令人唔開心，本來我怕人亂寫而唔去佢個Party，但佢契爺話唔好理人哋寫乜，唔好影響友情，覺得好啱，最後都照去。」此外，無綫落實收到港台回覆的律師信，港台承諾會肩負起無綫月底直播金曲頒獎禮之所有版權問題及法律責任，故無綫屆時連四大旗下歌手之演唱片段都會播出街。
此外，身為無綫愛將的謝安琪（Kay）力撐公司，昨日以廣東話在有線開腔。她昨日接受商台訪問，坦言收到公司通知可以廣東話接受不同電視台訪問：「方便啲，普通話唔係咁叻。（激嬲無綫？）冇咁諗，只想表達好啲效果會好啲！」Kay透露今日不會出席勁歌頒獎典禮，將赴廣州頒獎禮領音樂人獎，又指勁歌有冇獎都開心：「同無綫合作有好好回憶。（得番回憶？）有回憶都好吖！總有再做一日。」她透露不知道同公司的李克勤會否出席勁歌頒獎禮，但支持公司決定。而前晚環球唱片高級副總裁黃劍濤承認旗下歌手可以以廣東話接受無綫以外的電視台訪問：「合約一直冇列明唔可以用廣東話。（怕關係再惡化？）覺得唔會。」
無綫誘歌手回頭
而無綫勁歌頒獎禮昨日舉行拜神儀式，籌委會經理陳家揚透露下月將拍攝一系列歌手音樂特輯，似利誘四大公司歌手回頭：「6月推出。（跟亞視搞？）唔關事。（歌手以廣東話接受友台訪問？）要尊重番合約精神，份合約喺Legal Department，如違反當然唔開心，如冇違反我哋就No Say。」他表示已邀請四大唱片公司出席今晚的頒獎禮，缺席歌手有獎會照頒：「（四大唔嚟失色？）今日唔知聽日事，話唔定聽日握晒手做番朋友。」
昨日只有楊千嬅、古巨基及林峯等到場，千嬅直言感失落：「冇咗好多Friend，希望到時將情緒推到最高峰。（四大歌手以廣東話受訪？）唔知喎！但合約冇講明唔可以，我有時用唔到普通話會用廣東話幫手。（關係更決裂？）我只係Small Potato，公司嘢冇資格批評。」而基仔在「最受歡迎男歌星」的投票比數領先，他表示有信心：「最滿意過去成績，唱片、古Sir形象入屋。」