好耐都冇拍劇嘅江華，好多觀眾都好掛住佢，早前佢趁住聖誕節呢個普天同慶嘅日子出嚟見觀眾，只不過唔係喺螢光幕前，而係喺大埔文娛中心，小小So見咁耐冇見佢，咁就專誠去捧場，當日佢同老婆麥潔文一齊出席，兩口子一齊分享福音，過一個另類聖誕夜，見到佢得到一家大細同公公婆婆撐場，主持人仲話好懷念佢嘅唐三藏角色，真係戥佢開心，但係估唔到江華講講吓福音，竟然講對娛樂圈嘅感慨，仲講到頗為激動。
江華：點解我咁耐唔拍劇？係因為娛樂圈滿足唔到我，而且好虛假，啲藝人喺螢光幕前後都唔同，喺螢光幕前好似戴咗面具咁！
愈講愈激動嘅江華，仲攞咗兩個例子去印證佢對娛樂圈係虛假嘅睇法。
江華：藝人成日喺人前唔認結婚，點知轉頭就靜靜咁結咗；亦唔好睇平時有啲人有好嘅表現，其實背後會打女人。
小小So不得不佩服江華，雖然佢淡出娛樂圈一段日子，但係原來佢仲咁緊貼娛樂圈消息，一啲都冇脫節，大可隨時重返娛樂圈，等小小So同觀眾可以再見佢嘅風采。