江若琳（Elanne）將於本月15日在Star Hall舉行《MY FIRST SHOW 2010演唱會》，唱片公司請來鑽石級幕後班底打造「第一次」，先請來曾任天后容祖兒的健身教練為Elanne積極操弗，再有陳慧琳造型師兼好友Celia助陣。至於舞蹈方面，由郭富城的排舞師Sunny Wong全程特訓；而個唱監製則曾與張敬軒等合作，Elanne說：「冇時間去諗有冇壓力，只知道要用盡所能去把握機會，企喺台上面唔係代表我咁簡單，仲有身邊幫過我嘅人，冇佢哋我冇辦法行到呢一步。」

歌影視三線發展的江若琳，事業發展順利。

江若琳近期為處女演唱會，積極排練。資料圖片

撐硬恭碩良

從入行到經歷是非纏身，Elanne嘗過高低起跌，令她更珍惜機會和成果，變得更堅強，她說：「回應好傷害性嘅報道最唔開心，試過不停咁喊！」但她已學會適當的時候閉上耳朵，不讓外來因素影響工作。

對於因「過分」禮貌而被指虛偽，Elanne笑說：「初初聽到當然唔開心，亦檢討過，但諗深一層好搞笑，見到人打招呼都唔啱？總之識自己嘅人明白就可以喇！」回望過去3年，她學懂堅強，人氣橫跨歌影視，歌迷層面不再局限於少男，豬籠入水，但沒有因得到更多而改變，仍抱着一顆真誠的心，她說：「入行後，得到最好嘅一定係友情。」

此外，Elanne昨日到電台接受訪問，表示恭碩良連日來綵排她的個唱，指對方未受涉打醫生事件影響，大讚恭碩良專業：「知道呢件事，撐硬佢！（打人唔應該？）可能有少少衝動，佢都係保護女友！」