每逢年尾，一班歌手都忙於出席多個樂壇頒獎禮，不過唔好以為淨係佢哋忙，其實幕後軍師仲忙，為歌手預備戰衣嘅形象設計師尤其係！小小So早幾日同Nelson（張學潤）High Tea，佢話今年除咗幫HotCha打造幾個頒獎禮形象之外，仲幫好多位歌手客串揀衫，所以聖誕同元旦都忙到踢晒腳，連旅行都冇時間去！
小小So：咁多人搵你幫手，豬籠入水啦？
Nelson：梗係唔係，我半賣半送咁咋！今次我幫HotCha設計頒獎禮造型，除咗揀衫之外，仲落手落腳親自幫佢哋買布車衫！
小小So：之前你好似踩過佢哋着衫差喎？
Nelson：哈哈！講番都有啲唔好意思，不過之前次次出席大小活動見到HotCha着嘅衫，都覺得慘不忍睹，着到好似內地舞蹈藝員咁，一啲星味都冇。
小小So：咁今次又會幫佢哋搞造型嘅？
Nelson：喺一次工作機會下認識HotCha三個妹妹，覺得佢哋好有誠意、有潛質又勤力，自己之前咁樣評過佢哋，都有少少內疚！見佢哋新人Budget唔多，三人組合開支又大，所以咪一口答應幫佢哋搞造型囉！加上費事佢哋着啲唔襯嘅衫嘥晒，忍唔住就出手嘞！