來自加拿大嘅07年國際中華小姐季軍陳爽，每年一到聖誕節，身在加拿大嘅佢就會好期待落雪，希望過一個白色聖誕！佢同小小So講：「聖誕前1個月，每個人嘅話題都圍繞住聖誕當日會唔會落雪，真係好搞笑㗎！」
不過，陳爽來港發展後，就少咗呢份期望，好彩佢覺得喺香港過聖誕都唔錯，佢同小小So講：「擺喺商場嘅聖誕樹好大，我喺加拿大只會放一棵好細嘅喺屋企，好少機會見到咁大棵聖誕樹！平安夜有份參加倒數活動，同一大班同事過，好開心、好熱鬧！」
陳爽向來好重視聖誕節，佢父母每年都會送聖誕禮物畀佢，啱啱過咗嘅聖誕，佢就收到盼望已久嘅手機，佢原本想請屋企人去旅行，點知聖誕前3星期去旅行社問過，所有團都爆晒，佢同小小So呻：「我仲諗住趁聖誕同家人旅行，點知啲團Full晒，真係估唔到香港經濟咁好喎！」