原本要到杭州工作的Elanne，得悉JJ在上海出席活動後，即提前一日到上海與他吃午飯，她笑說：「我特登飛去上海食餐飯，成幾千蚊，好似好豪咁！」為了個唱戒油戒鹽兼節食的Elanne，卻為JJ破戒：「我哋叫咗20道主菜，又蝦又海鮮，仲食埋東坡肉，搞到我肥咗兩磅！苦練多時嘅黃蜂腰都冇埋，畀健身教練係咁哦，要我即刻狂操收身！」

江若琳專程飛到上海與林俊傑飯敍。	為個唱戒口的江若琳，坦言大吃大喝導致增磅。	江若琳與音樂才子林俊傑交換新碟，望對方賜教。

初次見面勁啱Key

雖然Elanne與JJ首次正式見面，但兩人相當投契，飯敍間更暢談星座，Elanne笑說：「我哋連口味都啱！最鍾意食漢堡包，大家又傾咗好多音樂嘢！佢好好人，個樣好Sweet！（有冇撻着？）第一次見咋！都唔會諗呢啲，識耐咗食多幾次飯先！」此外，二人交換新碟，Elanne更膽粗粗邀JJ為她寫歌。