在漫畫界地位響噹噹的黃玉郎，今年勢要在電影圈大展拳腳，計劃改編作品《神兵玄奇》拍成3D電影，亦會開拍《龍虎門2》。他認為3D片勢成香港電影市場大趨勢，相信武俠動畫3D片有一定市場：「成本貴啲冇所謂，觀眾一定會鍾意睇，同埋要入戲院先睇到個效果，唔通喺屋企戴3D眼鏡睇咩？」

發掘新人演《龍虎門2》

黃玉郎透露心目中已有《神》片最佳人選，並點名力邀台灣人氣偶像吳尊演出南宮問天一角：「呢個角色好有正義感，吳尊本身好帥氣，同男主角外形好似，又一樣咁大隻，所以想搵佢演出。」至於《龍虎門2》的卡士，會否由甄子丹及謝霆鋒等原班人馬演出？他直言雖然很想再與子丹合作，但對方身價今非昔比，片酬達1,600萬元一部，是重要考慮因素，黃玉郎說：「佢貴為09年最賺錢男星，好難夾檔期，片酬都係一個大問題，如果請唔到子丹拍續集，會考慮搵新人，將多啲資金放喺後期製作度。」

此外，黃玉郎的新作《春秋戰雄》明天出版，他透露整個構思及創作籌備長達大半年：「呢個故事講春秋時代，有好多成語典故，之前好少漫畫家寫呢類故事，我覺得除咗故事吸引，亦可以令年輕人學多啲。」