本文重點
陳偉霆（William）與徐子珊（Kate）昨日出席工展會活動，片約不斷的William，近日忙於為杜汶澤監製的新片《前度》開工，但礙於轉天氣令皮膚敏感，面頰長滿粒粒，他說：「係呀！塊面爛晒！由細到大天氣轉就係咁，好易敏感，而且又成日要拍戲冇乜休息，好彩呢兩日放假有得去睇醫生，依家食緊藥，應該一、兩個星期就好番。」他坦言幸好未有影響拍攝進度。
徐子珊攞生力軍感意外
提到新片，William透露前日剛完成與鍾欣桐（阿嬌）的咀戲：「佢喺戲入面係我前度。（啲靚女畀你咀過晒？）我真係好開心o架！都唔怕隱瞞大家。（好激？）次次問我都話好激，不過今次真係我底線！都去到好盡頭吓。（露股？）有少少，不過唔知導演會點剪呀！」他表示因《前》將是阿嬌復出影圈頭炮，他為支持對方而豁出去：「導演臨場要求我除衫、除褲都冇問題，我睇咗Playback都覺得好大膽，唔知會唔會係三級呢？」同場的Kate指日前奪得叱咤生力軍女歌手銀獎感意外，笑言講致謝詞時緊張得一片空白。
