有傳近年專心相夫教女的王菲,將於明年以天價復出開個唱,圈內圈外舉腳贊成,亦紛紛票選心目中的經典「菲歌」!
鄧麗欣《給自己的情書》、《流非飛》
「我8歲已經係佢Fans,咁細個唔知點解畀佢吸引咗,我諗係佢嘅歌同造型都好靚同好得意!細個我會學晒佢啲歌,又會扮王菲嘅《流非飛》造型,用毛巾周圍Fing。之前佢開騷我場場都去睇,仲同佢握手。呢首歌好感動到我,好有共鳴!」
陳法拉《暗湧》、《約定》
「我係王菲超級Fans,想佢快啲復出同開騷!《暗湧》嘅歌詞意境好好,《約定》亦係我成日哼住嘅歌。」
楊千嬅《流非飛》
「首歌係佢一大突破,嗰段時間佢去咗美國,返嚟後喺音樂同工作上有好大改變,當年佢好潮,歌路同衣着打扮係人、歌合一嘅天后。王菲好有自己風格,潮喺談吐同思維上,佢講完嘅嘢我會返去諗。」
G.E.M.《償還》、《給自己的情書》、《你快樂所以我快樂》、《執迷不悔》
「王菲好有性格,演唱會唔請嘉賓,自己唱晒成場。佢一直好努力畀人睇自己真正嘅一面,即使啲人對佢有誤解,但佢已當係工作一部分。王菲好知道自己做緊咩,認為一件事冇錯就去做,唔介意人哋點睇。」
謝天華《我願意》
「首歌好Sweet,歌詞由女仔角度出發,我會嘗試用男仔角度去感受。有咁好嘅聲音,贊成王菲快啲出番嚟!」
古巨基《意願我》
「呢首歌好浪漫,係黃國倫老師嘅作品,有次睇過黃老師一個訪問,知道首歌係為神而寫,所以覺得歌詞好有意思,入面寫嘅『愛』好大。」
林峯《紅豆》
「佢把聲係Icon,聲線冇人模仿到,我以前訪問過王菲,佢幾Nice o架!嗰時話佢唔唱歌,相信廣大嘅樂迷都會失望,如果佢復出,我相信包括以前嘅樂迷同後生樂迷,都有好大回響。」