解散7年的LMF，前晚在九展舉行《LMF THE WILD LAZY TOUR》音樂會，吸引逾千人捧場，包括陳奕迅、何超儀、梁漢文、劉浩龍、李璨琛、黃泆潼、Mr.成員MJ及其女友卓韻芝等，樂隊「秋紅」暖場後，LMF便在叫囂聲中出場，有觀眾潑水及飛遮，場面危險，而現場更發現多名3、4歲小朋友。

觀眾情緒高漲，與LMF齊齊爆粗及高舉粗口手勢。

放大圖片

LMF貫徹火爆作風，喪唱粗口歌及高舉粗口手勢，成員Jimmy更公然在台上吸煙，而嘉賓李璨琛亦在台下吸煙。當獻唱《東亞病夫》時，MC仁語帶輕佻地說：「話人係東亞病夫嘅人，就有機會畀人話係病夫，自己認係病夫，就一X定係病夫！」期間，有成員將水樽掟落台，觀眾拾起輪流飲用，而DJ Tommy捽碟時，有疑似農夫的聲音大叫「Fxxk You」，音樂會結束後，場地遺下不少啤酒罐及煙蒂。

擔任嘉賓的李璨琛，上台前公然煲煙！	台上台下齊齊煲煙，公然挑戰法律。	放大圖片

最高罰款五千元

DJ Tommy昨日接受電話訪問，對於觀眾吸煙及飲酒，他說：「場內人山人海，我淨係睇到台上啲人做乜！」問到是否挑戰法律，他說：「挑戰？我淨係見到啲人舉晒手，台下真係乜都睇唔到！（有農夫把聲？）啲聲唔係佢哋！」至於成員阿庭聽到「4宗罪」後即說：「唔答呢啲問題，唔得閒！」

門票列明年滿十二歲才可進場，但現場的小朋友明顯「唔夠秤」。

音樂會結束後，場地遺下啤酒罐及大堆煙蒂。

另外，記者致電主辦單位，發言人指門票註明不准12歲以下兒童入場，相信小朋友是由家屬帶往，至於觀眾食煙及飲酒，他說：「現場有千幾人，我哋控制唔到，但會勸止！（有冇人投訴？）歌手表演時有佢哋嘅情緒，最重要係安全。」至於控煙辦發言人則表示，暫未收到有關投訴，歡迎觀眾提供照片或影片舉報，若屬實，違例者可被處定額罰款1,500元，或被控觸犯《吸煙（公眾衞生）條例》，最高罰款5,000元。