王菀之（Ivana）一向係圈中嘅隱形富婆，買親嘅衫都係啲連名都唔識讀嘅外國牌子，小小So早排收到風，知佢買咗條幾萬蚊嘅Chanel手鏈獎勵自己，估唔到呢幾日見到佢，喺左手手指公又戴住隻閃到爆嘅戒指！
小小So ：Ivana，乜你又買咗隻新戒指呀？
Ivana ：唔係呀！係我阿哥送畀我嘅生日禮物嚟o架！
小小So ：點解你隻戒指咁特別嘅？有一粒大嘅星星，又有一粒細嘅星星。
Ivana ：係呀！大嗰粒星星代表我阿哥，細嗰粒就代表我，因為我阿哥成日唔喺香港，咁呢隻戒指就代表佢，當佢唔喺香港嘅時候，就由呢隻戒指守護我！
Ivana同佢大佬果然兄妹情深，小小So仲知道呢份兄妹情真係幾貴吓o架！原來隻戒指係Chanel限量版，價值四萬幾蚊，Ivana仲話依家有人喺網上炒，好似已經炒高幾倍添！Ivana又開玩笑咁話，第時如果唔夠錢使，賣咗隻戒指都夠佢生活一個月！