李蘊與同公司的劉欣宜（E Cup Baby）見面時間甚多，問到有否爭吵？她說：「暫時冇喎！佢係一個好人，同佢做到朋友，我哋坐車時會嘈到拆天。」問到會否羨慕對方身材？她笑說：「佢好誇張，試過同佢試衫，拉唔到拉鏈，仲逼爆衫。（羨慕身材？）最緊要平均。」

18歲女恨初戀

今年年僅18歲的李蘊，愈大愈靚女，理應吸引不少裙下之臣，但她表示至今仍未有戀愛感覺：「我12歲入行，啲人成日問我有冇男仔追，我話冇，佢哋又唔信，我細佬都已經有拍拖經驗，我都好羨慕。（公司阻止？）公司同家人都冇阻止。」談到擇偶條件，李蘊表示不能比她矮、最好年齡相若、毋須太靚仔：「靚仔冇乜用，唔係靚仔反而安全感大啲，仲有最緊要唔好五時花六時變。」

事業方面，李蘊今年推出EP、換了成人身份證及拍電影，工作忙碌，她說：「今年係做嘢做得最開心同滿足嘅一年，又識咗好多朋友。」問到會否渴望放假？她竟說：「我唔想放假，我想做嘢，成日喺屋企好悶。」