記得當年仍然係新人嘅阿Kay，因為未婚懷孕，所以人氣大增，而且身懷六甲嘅佢，突然殺入電視城探望正為《勁歌金曲》錄影嘅老公張繼聰，由於係大肚之後首度公開露面，小小So當日咁啱入城探啲高層，見到佢好似有啲凸肚，諗住同佢影番張靚靚孕婦相，仲講笑同阿Kay講：「你側側哋影張啦！」點知佢話：「點解你咁搞笑，有正面唔影，要影側面？」

事隔一段時間後，直至一次喺夜晚舉行嘅商場活動，小小So同佢再次「重逢」，本來諗住同佢傾番幾句，點知佢身邊嘅助手即時攔住，仲話：「你5分鐘傾唔傾得完？佢要上台表演，不如一陣先傾！」你知啦！小小So成日去啲飯局同高層傾密偈，都冇乜幾何有時間同啲星傾番幾句，小小So啲時間都一樣咁寶貴o架！點解啲星成日會畀人話，其實啲助手認真要諗諗！