四大唱片公司包括華納與無綫鬧版稅風波而反目，屬華納歌手的薛凱琪（Fiona）在《勁歌金曲》獎項凍過水，但《叱咤》流行榜播放率則一度領先，被睇好打入「叱咤樂壇女歌手」三甲。對於女歌手金獎，Fiona不敢抱以希望：「有人講我已經好開心，覺得大家對我有信心，但唔會因為咁飄飄然，怕希望愈大失望愈大，攞唔到咪好尷尬，我唔會計較有冇獎！樂壇咁多女歌手，攞唔到金、銀、銅唔代表唔成功呢！」

而Fiona一直抱不「恨」獎心態，免得自己太辛苦，至於可渴望躋身天后之列？她說：「呢啲名係人哋畀，有呢啲名有好亦有唔好，好嘅係有人認同，當你去到天后位置，就要有天后應有嘅生活方式、做人處事嘅風範，唔好嘅係孭咗呢個名，有乜差池做錯，就會畀人放到好大去睇。」

無法「撇甩」祖名

提到父親被爆債務纏身，Fiona曾激動痛哭，她說：「我唔係為自己喊，係因為爹哋，佢只係普通人，唔係我，佢唔會畀人寫，但反過嚟要爹哋擔心我，我最難受，但最難捱嘅日子都過咗啦！」至於與緋聞男友房祖名，Fiona笑言一世無法撇甩祖名，只能靠時間去證明，或是將來她和祖名各自有拖拍時，希望緋聞可以抹掉。Fiona坦言期望真命天子的來臨，到時兩人光明正大十指緊扣行街拍拖。

薛凱琪與父母互相支持，捱過一個又一個難關。

提到緋聞男友房祖名，Fiona坦言希望有日各自覓得真命天子。