中巴混血女模鄺敏慧前日因與男友崔建邦吵架而指控被毆打，最後報警。昨日她在經理人陪同下在所屬模特兒公司開記者會，交代事情經過。原本她在當日下午1時至4時要到石澳進行攝影工作，亦臨時取消。記者會於下午3時35分開始，束着馬尾的鄺敏慧，以便服打扮素顏示人，身旁的經理人Frankie帶出開場白說：「佢尋日遇到打擊同唔舒服，未有即時交代到件事，佢仲好激動，情緒仍好低落，依家個頭都仲好暈，一陣要去睇醫生。」
記：記者 鄺：鄺敏慧
記：今日開記者會嘅目的係咩？
鄺：尋日發生咗啲唔開心嘅事，我畀男朋友打。（明顯很不開心，似心事重重。）
記：你男朋友係邊個？
鄺：我男朋友係崔建邦。（語氣肯定。）
記：佢為咩要打你？
打到險窒息
鄺：可能因為性格不合鬧交，佢要搶我電話，想Delete晒我哋嘅合照同SMS。
記：佢點打你？
鄺：佢首先襲擊我嘅頭部，我成個跌咗落地下，我想走，佢就用腳夾住我條頸，之後又用手扼住我條頸，騎住我喺地下，扼到我抖唔到氣，有窒息感覺，當時我好亂。（說時邊用手模仿扼頸的動作。）
記：佢當時係咪發咗狂？
鄺：我有叫佢放開我，我話可以攞部電話，但佢冇理我，繼續扼住我條頸，佢搶到個電話後就Delete啲相同SMS，我趁佢Delete緊時想走，不過佢鎖咗間房，走唔到，跟住佢捉番我，話要番部相機，嗰部相機係佢送畀我嘅，佢摷我手袋摷唔到，我自己攞出嚟掟番畀佢，佢就畀番部電話我，我先走到。
記：當時屋入面有冇其他人？
鄺：佢哥哥喺度。
記：有冇勸交？
鄺：當時我哋喺房，我有叫救命同埋報警，不過冇人理我，唔知佢係咪聽唔到。（語帶無奈。）
記：你哋同居？
鄺：唔係同居，我哋久唔久見吓。
記：之前有冇發生過類似嘅事？
鄺：之前佢試過飲醉酒返嚟摑咗我一巴。
記：點解要摑你？
鄺：可能佢飲醉咗有啲碰撞。
記：你男朋友係咪有暴力傾向？
鄺：唔知可唔可以咁講，我諗有少少。（起初有點猶豫，之後卻說得肯定。）
記：你哋一齊咗幾耐？
鄺：我哋由今年8月29號開始拍拖。（肯定地說出日子。）
記：嗰時佢同唐詩詠分咗手未？
鄺：以我所知佢話佢哋已經分咗手，佢有畀我睇佢哋分手嘅SMS同埋介紹我畀佢啲屋企人識，我先肯同佢一齊。（言語間似很相信崔建邦。）
記：點解佢嗰次摑完你之後你仲同佢一齊？
鄺：我當時都驚，但佢話唔會再咁做，我都畀機會佢，估唔到佢今次會咁做。
記：事發後佢有冇聯絡過你？
鄺：我由尋日開始就熄咗電話，唔知佢有冇搵過我。
記：佢知唔知你今日開記者會？
鄺：我唔知佢知唔知。
記：你依家嘅意願係點？分開？
鄺：我單方面嘅意願係分開。
記：你依家係咪告佢？
鄺：唔方便講住，交咗畀警方。
記：如果佢要求庭外和解，你接唔接受？
稱曾遭恐嚇
鄺：我心情仲係好亂好驚。（開始傷心地哭泣起來，要拿紙巾拭眼淚。）冇啲咁嘅經驗！我要食安眠藥瞓覺，同媽咪一齊瞓，半夜都會醒。
記：你平時對你呼呼喝喝？
鄺：平時相處時都好正常，佢係性格暴躁啲，我都會就吓佢。我哋嗌交時佢會講粗口，尋日我哋嗌交，我話走、想離開，唔知點解佢今次真係失控咁！
記：你同佢講分手？
鄺：經過今次件事唔想講分手都唔得。（帶點無奈。）
記：你提出過幾多次分手？
鄺：我冇提出過分手，每次都係佢提出，但係過幾個鐘後，佢會打電話嚟氹番我。
記：如果今次佢再搵你呢？
鄺：我諗暫時唔會，我唔會聽佢電話同埋唔會睇佢啲SMS。（語氣堅定。）
記：對佢仲有希望？
鄺：唔知！我好亂，我目前只係諗自己嘅工作同屋企人。
記：你屋企人見過佢未？
鄺：我全屋都見過佢，對佢印象好好。
記：你屋企人知唔知今次嘅事？
鄺：我原本唔想同我媽咪講，不過返屋企後媽咪見到我啲傷痕，佢都喊咗出嚟。（此時她第二度灑淚，聲線有點激動。）佢平時對長輩好好，冇人估到佢會咁。
記：佢咁緊張啲相同SMS係咪佢唔想承認你哋嘅關係？
鄺：係！佢係一個Artist可能唔想人知，我都有幫佢隱瞞，人哋問我，我都話唔會同佢一齊，我冇諗過話要公開，當日佢仲同我講咗啲恐嚇性嘅說話。
會帶眼識人
記：講咗啲咩？
鄺：警方話唔好講。（欲言又止。）
記：佢有公開同唐詩詠嘅關係，但唔肯公開你？
鄺：我冇諗過要全世界知，大家一齊最緊要係開心。
記：你仲鍾意佢？
鄺：唔清楚！唔知對佢嘅感覺，好亂。
記：點解佢第一次摑你之後你仲容忍到？
鄺：鍾意一個人會盲目，我信佢肯為我改。
記：覺唔覺得佢人前人後兩個樣？
鄺：都有少少呢種感覺。
記：你哋識咗幾耐就一齊？
鄺：出嚟食吓飯飲吓嘢，好快一齊咗，識咗唔夠一個月。
記：你哋點識？
鄺：係做《打出十人巷》個節目時識嘅，係佢追我。
記：下次會唔會帶眼識人？
鄺：會。
這時，鄺敏慧身旁的經理人表示，鄺電話內仍儲存了部分她特別冧的SMS，其舊相機內仍有與崔建邦的合照。
記：你公開啲相為咩？（聽罷問題後不懂回答，身旁的經理人馬上為她解畫。）
鄺經理人：我諗我幫佢講，出面啲人成日覺得佢係第三者，我哋想大家知道佢唔係第三者身份介入。
記：你自己係咪都係咁諗？
鄺：係！係咁樣。
記：有冇諗過你咁做會影響到佢嘅事業？
鄺經理人（搶答）：咁畀人打、畀人恐嚇就要報警，報得警梗係要講真話！
鄺：佢都冇諗過我。（語帶不忿。）
記：係咪今次忍無可忍？
鄺：我唔容許有人郁手打我，之前嗰次可以賴係飲醉酒，今次唔係！（說時有點嬲怒。）
接着她展示兩人的情話SMS及崔建邦親手寫給她的情詩，其經理人一再強調：「我哋開記者會係因為對方否認呢件事嘅發生，所以想證明件事係真嘅，並唔係我哋無中生有，又畀人打又畀人恐嚇，所以先要報警，佢（鄺敏慧）生命受到威脅，我哋唔係黑社會。」鄺敏慧聽罷亦點頭以示贊同。記者會在4時5分完結，歷時約半小時。