舒淇穿上低胸裙，以冶艷造型與甄子丹、黃秋生等，為劉偉強執導的新片《精武風雲》在上海開工，電影公司斥資二百萬搭景，又動用二百名臨時演員，拍攝這場夜總會戲。舒淇在天寒地凍下，還要在鏡頭前風騷地載歌載舞，她說：「我着咗三條打底褲，貼咗七、八個暖包，仲出埋毛毛鞋保暖，甄子丹之前拍落雨打戲冷病咗，我都要保重身體。（搵人嫁咪唔使辛苦？）劉偉強都唔娶我，我好享受工作，要我做少奶奶一日到黑好食好住，我會唔開心，不過做冬、聖誕節都要開工，又真係幾辛苦囉！（知唔知台灣日前地震？）我聽到花蓮地震都嚇親，好在媽咪冇事！」

舒淇表示要天寒地凍下載歌載舞，所以全身貼滿暖包。

甄子丹（右起）、舒淇和黃秋生等，在上海拍攝劉偉強新片《精武風雲》。

教偉仔防受傷

以二撇雞造型上陣、飾演陳真的甄子丹，被指似梁朝偉及奇勒基寶，子丹說：「唔好成日講佢，我唔識放電，演員有好多表演方式，我都有啲魅力，唔使眼眨眨。（教偉仔兩招防受傷？）得閒會教，不過大家拍攝地點唔同，其實唔打就唔使傷，我部部戲都打到傷痕纍纍。呢套戲我都由頭打到尾，仲會着西裝、溝女、彈鋼琴同講法文。（有冇床戲？）我哋好健康，冇床戲冇Kiss戲，唔使賣弄呢啲。我以前返內地學功夫，試過冇錢喺酒店彈琴賺錢，所以彈琴難唔倒我。」

劉偉強則拒絕多談《風雲Ⅱ》，只表示當年他執導的《風雲》開畫票房有420萬元佳績。他指《精》片投資逾億元，搭景逾十個，預計明年二月拍竣，年底上映。