本文重點
對於最近有指何超瓊與表哥何東舜銘入主澳娛，何超瓊與何超蕸昨晚出席活動時否認屬實，超瓊說：「我哋一直冇聯絡，好耐之前喺公司有爭拗！（何東舜銘同老婆離婚喎！）有睇，但同公司冇相關，覺得報道寫公司嘅狀況同股份分配有偏倚！」她又否認何東舜銘是初戀情人：「我哋只係表兄妹！（何鴻章唔認仔？）唔關我哋事，嗰個人同我哋屋企冇關係！（十姑娘好耐冇見人？）我唔知，亦都唔會知！（賭王知唔知？）我哋冇同佢講！佢都唔會關心！」談到有指澳娛05年派股息給十姑娘，有如為賭王討回公道，超瓊說：「我哋唔需要討公道！我哋場場官司都贏！我哋係負責任同依法嘅企業，唔需要理呢啲！」
賭王精神不俗
此外，賭王何鴻燊前日出院數小時專程出席澳門回歸十周年典禮，超瓊坦言父親坐車及坐船期間均不肯休息，直至回醫院才肯睡覺：「Daddy見完胡錦濤之後好感動！」她表示會再與醫生商量父親的出院日期，但相信離出院日子不遠，更透露賭王知道能請假外出後，可能會常常要求出院：「始終佢年紀大，加上呢排有流感，都要睇緊啲！屋企仲欠啲清潔設備！」何超蕸則透露父親應趕不及回家過冬至，不過家人會於聖誕與父親食飯慶祝。