接着，陳復生說於十一月初收到Michael的律師信，獲告知和對方組成的基金會於同月十八日開會，她說感到奇怪的是，基金會組成至今，從無開過任何會議：「其中一個議程，係將三隻戒指捐畀基金會。十月中同十姑娘食飯時嗰陣，佢從來都冇提過。」

Anita此時補充，三隻戒指是於九十年代初，跟母親到英國的Graff購買四隻包括圓形及梨形等不同款式的戒指，當時十姑娘說是買給新抱及女兒：「每一隻有十卡，依家每隻市值千幾萬。Michael揀咗圓形，我揀咗Oval（橢圓）形。」直至02年，因Michael欠債，十姑娘把其中三隻戒指做抵押：「當時Michael欠咗好多錢，要十姑娘去帳房（澳娛）借錢，Michael舅父（何鴻燊）話要十姑娘以三隻戒指做抵押，直至04、05年先還清債，戒指亦退還，當時十姑娘都話：『心願都係想畀番戒指佢哋（子女新抱）。』喺02年至05年期間，因為分紅要嚟還債，呢段期間係冇分紅攞。」

現在保管三隻戒指的陳復生透露出席上月十八日的會議時，Michael、律師及一位長輩委員均列席，會上她主動請辭：「唔想同情心同正義感被利用，發生好多不可解釋嘅事，好擔心會影響自己聲譽。喺會上我話只要見到十姑娘親口叫我咁做，同埋見到十姑娘嘅Medical Report，我隨時可以交戒指出嚟。但係咪十姑娘嘅意願？我結婚廿年，一直都聽十姑娘話兩個女可以隨時住嗰間屋，從來冇話要佢哋搬，呢個係親人，點解突然要佢搬？」

陳復生更指Michael於本月九日寄出律師信，限於五日內交出三隻戒指給基金會，但於十四日才收到信件：「Anita喺十八號發信要我七日內交還戒指。我作為中間人，如果畀是但一方都唔可以，律師話如果有人入稟，最終戒指係由法庭保管，到打官司時要十姑娘出庭作證。」她續說有人放料令離婚一事曝光，並澄清是以對方有不合理行為作申請理由。