去年曾通電話聯絡
Anita表示與母親對上一次通話已是去年的三、四月,當時十姑娘亦希望跟她修補關係見面,Anita說:「Uncle Eric叫我去機場見佢,當時我冇現身,淨係同媽咪講電話,媽咪問有幾耐冇見面,又話如果我可以唔告佢,佢就會見我。又問我點解咁多年冇搵佢,我話唔知佢住邊度,佢又問點解佢生日、聖誕同過年都冇送嘢畀佢同探佢。」Anita無奈表示跟母親的聯絡遭人封鎖:「佢唔知我哋根本送唔到嘢畀佢,因為就算送嘢畀佢都打回頭,搵佢見佢都入唔到去,佢工人唔會開門,管理處趕你走。」
母曾表示冇樓冇錢
主動留低手提電話給母親的Anita翌日就收到十姑娘電話,詢問細佬麥家興及女兒的近況,十姑娘更主動提出見面,Anita說:「佢同我講星期日會嚟見我,又突然間講話『我冇錢,我乜都冇,首飾又冇,屋又冇,股票又冇!』我話:『媽咪,我唔係問你攞錢,淨係想見你。』」滿心期待的Anita於星期日等了一整天都不見母親蹤影,她說:「星期一佢再打嚟,話腳痛所以嚟唔到,我話唔緊要,不如我嚟見你,跟住個電話即刻冇聲,好似畀人Cut咗咁!」與十姑娘和好的Anita隨後在告母親的官司中除去自己名字,不久就收到何東舜銘(Michael)的律師信,她無奈地說:「佢話媽咪好開心我冇告佢,但係我都唔可以見媽咪,因為我同家興一齊告我媽咪,就算我唔告,都要等家興一齊唔告先見得。」
指有人「Keep住佢」
毫無辦法之下Anita再找何鴻章幫手:「佢舊年年尾約咗Michael出嚟兩次,但點講都唔肯畀我見,甚至連Uncle Eric都唔畀見,佢都帶唔到媽咪出嚟。」本月11日Anita再次收到Michael的律師信,要她在下年1月31日前搬離堅尼地道30號:「媽咪從來冇講過收屋,佢甚至講過畀我住過世,當時我去查屋契,先知道原來Katie(陳復生)同Michael搞緊離婚。」問到Anita知不知道對方的動機?她說:「我諗有人暫時唔想畀佢(十姑娘)見任何人,接觸任何人。佢都係Keep住佢喺一個Apartment(住宅),對住啲工人咋!」Anita又謂非常希望再見十姑娘,一起飲茶、食飯,讓她見見自己的孫,得回正常生活!
Profile
麥慧貞為何婉琪(十姑娘)與第一任丈夫麥志偉所生的大女,早年曾和弟弟一起入稟法院與母親何婉琪打官司,又數十姑娘偏心私生子何東舜銘。