雖然擁有「五短身形」兼且「其貌不揚」，但王祖藍出道以嚟一直都好好「艷福」，除咗分別同過蔡少芬、呂慧儀呢啲靚女傳緋聞外，拍戲時仲成日同女藝員咀嘴，咀完薛凱琪後，近日仲咀埋鍾嘉欣添！不過，祖藍同小小So講原來一啲都唔Enjoy，仲講笑話難為啲女對手添！
祖 藍：嗰日我同鍾嘉欣拍咀戲，初初我仲講笑話佢好慘，拍完咀戲一定會嘔，點知佢之前嗰兩日病咗乜都嘔乾嘔淨，搞到我好「失望」！呵呵！
小小So：咁你真係好鬼好艷福喎！
祖 藍：好咩啊！淨係拍戲有得咀有鬼用咩！現實生活中同潤唇膏就有得咀！我都好想快啲搵番個伴呀！
小小So：乜你真係咁恨拍拖咩？
祖 藍：唔好亂講！我事業為重o架！哈哈！其實都係因為近排太多朋友結婚，見到佢哋咁開心，我都有啲心癢癢啫！我唔急o架！你唔好搞到我好似好恨「嫁」咁呀！