在這十分一個世紀期間，伊健經歷過大起大跌，全身退出樂壇的念頭更曾閃過腦海，他說：「嗰時覺得自己已經消失，同自己講唔好再留戀，專心拍戲拍廣告都夠使啦！」念頭終歸念頭，最終並沒有實踐：「十年來我搬咗三次屋，試過負資產、零工作、零收入，又試過忙到兩日冇瞓過覺，有錢冇時間使。」
20年的磨練令一向孩子氣的伊健成長，令他多了份責任感，學懂承擔。入行多年，伊健面對流言蜚語變得百毒不侵，認為最重要對得住自己，他笑說：「我個人有樣好，做人好認真，但對閒言閒語唔認真！把口生喺人哋度，人哋鍾意點講就點講。不過，的確有段時間好介懷，但諗到介懷與否人哋都會照講，就費事再諗去激親自己。」
大牌檔擺婚宴
雖然伊健笑言「男人做嘢唔好成日將女友掛喺口唇邊」，但被問到感情事時仍不吝嗇「講幾嘴」。40歲生BB大計雖然泡湯，但伊健滿足地表示現階段跟蒙嘉慧的二人世界好開心，至於結婚？他說：「或者，我潛意識好反叛，你哋愈催我結婚，我偏偏唔想結！」說正經，伊健表示暫時沒有結婚計劃：「真係冇認真諗過，亦都冇計劃過。拍戲見得太多，覺得『結婚』好悶，去飲喜酒就好開心，但冇諗過要做婚禮上嘅男主角。」如果真的要結婚，伊健亦不要傳統的婚禮，「大牌檔擺幾圍」較貼近他的性格！
今年是伊健的「回歸年」，不僅延續11年前的聶風傳奇，更再次踏上紅館舞台，為自己圓夢是背後最大因由，他認真的說：「雖然曾經諗過完全離開樂壇，但係個心一直好想再喺紅館開個唱，相距上次開騷已經係11年前嘅事，呢段日子拍咗好多電影，有好多歌好多Idea都想做，好想為自己留下回憶，唔想將來後悔。而接演《風雲》續集亦都還我一個心願，第一集只係一個序曲，今次人物故事更加深入。」
愛自由逍遙派
身為羅文（籮記）徒弟，伊健在歌、影、視、廣告四棲應付自如，問到以前輩身份「復出」歌壇的他有否收徒計劃時，他即時嘩嘩聲耍手擰頭說：「唔敢當！雖然入行多年，但一直學習緊各式各樣嘅武功，除咗籮記之外，我都有喺唔同老師度學到好多唱歌同舞台表演技巧。」伊健自喻為超然物外嘅逍遙派，而恩師籮記在他心目中則是武林中人人推崇的武當派：「雖然跟佢學習嘅時間唔長，但真係獲益良多，無論係演唱會或者演出，自己都會滲入一啲籮記所教嘅嘢。」
向任何人學習
樂壇新人輩出，42歲的伊健不介意別人提起他的年齡，他笑說：「有啲嘢係事實唔會逃避，好似我見到G.E.M.（鄧紫棋），如果佢叫我『叔叔』都冇所謂，年齡係事實，正如我會叫佢『妹』一樣！」叫甚麼始終只是一個稱呼，最重要是人與人之間互相學習，伊健說：「讀訓練班嘅時候，老師講過：『無論你係咩大人物，都係學生；眼前人無論是誰，都係老師！』任何人身上都有值得學習嘅地方，以前嘅我未參透呢番說話，依家開始實踐，係一項非常好嘅修為訓練！」
後記：男人情義
電影中「浩南哥」一出現，「山雞」總在身旁，而現實中鄭伊健與陳小春亦分屬兩肋插刀的老友！伊健說：「同小春好少見，可能一年通幾次電話，我哋成日覺得大家嘅關係好似劍客咁！同佢好有緣分，好有默契，佢好率直，唔難相處，做朋友佢絕對唔會害到你，一啲都唔危險！」