港姐冠軍徐子珊甫出道便當選四料港姐，又曾得無綫的「飛躍進步女藝員」及《金像獎》「最佳新演員」，獎項愈多令身邊人對她的期望愈高，為她在即將舉行的樂壇頒獎禮中構成無形的壓力：「身邊人比我緊張，怕令Fans失望，而且都要對TVB同唱片公司交代，都會有壓力。」不過她對樂壇頒獎禮未感緊張：「冇諗獎項問題，一向對頒獎禮期望唔大，當自己唔得先，咁樣失望會少啲。」她只着重眼前的工作，對獎項處之泰然：「心情唔可以受獎項影響，我接住仲要工作，而且拍戲同唱歌嘅心情唔可以互相影響，要攞個平衡。」
子珊在短短四年多時間內，走遍歌、影、視三個圈子，全因她抓緊每一個機遇：「機會嚟到，我即刻答『好』，唔理自己得唔得。」因為這個爽快的「好」，讓她從電視機躍入大銀幕，今年再跳入全新的演藝範疇——樂壇：「出碟係機緣巧合，入行嘅第2年，大概係05、06年，我去咗試音，我冇唱歌基礎，只有學跳舞而得嘅節奏感，勉強去試唱一、兩首歌，但一路都冇回音，咁就專心拍戲。上年樂易玲小姐打嚟，我嗰時揸緊車，佢話：『子珊，幫你出碟』我當時都『O嘴』。」
感激伯樂樂易玲
既然子珊得到無綫高層樂易玲的賞識，享有天時的着數，在地利及人和上亦要好好配合才能成功突圍，唱片公司睇準香港市場欠缺動感的女歌手，特意打造她成跳舞歌手：「冇嗰樣嘢先做，咁先有發展空間，而且做過調查，知道大家都鍾意我跳舞。」為踏入樂壇，她亦加緊鞭策自己：「以前一星期練兩日，我覺得唔夠，依家一星期練三、四日，人唔係機器，每次嘅過程都唔一樣，狀態可能會唔好，人哋唔會體諒，咁就要練到連狀態唔好都可以演出，好彩做新人會有好多適當嘅體諒，咁樣進步空間會多啲。」
子珊入行以來不停蛻變，但坦言未習慣歌手這個新身份：「我真係有啲怯，實在太多嘢要兼顧。」她覺得自己未能勝任歌手，還要向前輩學習：「唱歌唔似拍戲咁有鏡頭輔助，做歌手要比做演員更有自信，個人魅力好重要，自己要儲多啲經驗。我會睇外國歌手Beyonce嘅演出，佢唱快慢歌都得，而且係個獨立女性，又健康又性感，係女性嘅典範，我都好想做到陳潔靈咁，不過距離真係好遠，唔敢高攀。」
批評當作推動力
回顧過往一年的歌唱生涯，子珊曾受走音的批評，她勇敢跨過每一個小挫折：「就算係演戲演咗十年，都可以再話你，咁就積極面對，將負面評語轉化做推動力，我唔敢話咁樣一定會成功，不過不斷試就一定唔會失敗，我唔會逃避。」除了批評外，她亦有很多蝦碌搞笑的回憶：「試過第一次用Headset表演，佢就飛脫，又試過傾盆大雨時要表演，工作人員話用Headset易觸電，揸咪會安全啲，咁我就練習手揸咪都可以跳舞跳得好睇。」
不愛靚仔愛才子
子珊曾與馬國明和吳尊等靚仔合作拍戲，不過緋聞卻不多：「我唔鍾意靚仔，要有才氣、成熟、照顧到我同有責任感，不過仲未搵到。」其實她不為戀情着急，反而希望在工作上尋找鍾意的感覺：「『鍾意』兩個字好奢侈，我仲未分析到鍾意邊個範疇嘅工作。」
後記：走得快失安全感
子珊的演藝步伐的確很快，令她缺乏安全感，不過她仍樂觀地面對下一年的新挑戰，樂於從工作中認識自己：「由電視去到電影，再去唱歌，依家係冇安全感，暫時冇方法消除不安，不過我都好期待下年嘅挑戰，好似啱啱試過配音，對我嚟講又係新範疇，面對新工作我好興奮，等我知道自己有Talent（天分）。」