前晚伊健在紅館舉行首場《鄭伊健友情歲月09演唱會》，圈內圈外好友齊撐場，台下有女友蒙嘉慧（YoYo）、《風雲II》中合演情侶的蔡卓妍（阿Sa）、師弟陳柏宇及特別由外地趕返港的草蜢等，台上則請來好友陳小春及舒淇做拍檔。

伊健從後攬實舒淇，台下的蒙嘉慧當然要睇實！	放大圖片	伊健穿上純白襯衣，透現「岩石胸」。

伊健與舒淇在舞台上火辣貼身共舞，動作大膽，自摸撫摸樣樣齊，伊健更疑似輕撫舒淇胸部，大膽程度令台下嘩然，實行以舞蹈填補服飾密實的視覺效果。由於「劇情」需要，舒淇推開上前索吻的伊健，大派檸檬。伊健感謝未有到場的劉偉強導演願意放「淇」，才有精彩演出。

由於激舞被台下的YoYo望到實，伊健除略為避重就輕外，更即時補數向她所坐方向唱出情歌《同一秒》，以免完騷後被扭耳仔。

封胸「點」誘Fans

闊別樂壇多年，伊健實力無減，全場又跳又唱大熱金曲，與歌迷集體回憶。十多年間，在行內、情海跌宕的伊健，笑說乃人生必經階段：「轉眼間幾十年，要換都換咗，有冇人換咗10幾次？唱起呢啲歌都勾起我好多回憶。」他還唱出已故恩師羅文的金曲《前程錦繡》，以表懷念。不過論性感程度，則略為令人跌眼鏡，皆因騷前曾被拍得Fit到漏的伊健，竟封胸上陣未有大晒「岩石胸」，最性感只能數在安歌時，穿上一件純白貼身襯衣透點現身。握手時，伊健除應要求向歌迷派「汗」外，又與阿Sa握手。安歌後，歌迷仍未肯散去，伊健亦難擋熱情再次出場，與歌迷大合唱《一對對》，為個唱畫上句號。