近日傳出跟何東舜銘結婚20年的陳復生，上月底正式申請離婚外，更有傳她和丈夫聯名持有的部分物業已暫緩註冊（釘契）。
陳復生昨日回覆本報時直認離婚一事：「我申請咗離婚程序，依家由家事法庭處理中，現階段唔方便作出任何回應，好多謝傳媒同大家關心。」
事件峰迴路轉，陳復生直認結束20年婚姻的同時，身為陳復生老爺的何鴻章，昨日回應本報記者時表示，有聽聞兒子離婚一事時，但竟斬釘截鐵指何東舜銘不是其兒子！
何鴻章跟何東舜銘的父子關係於2001年才正式曝光，當時何鴻燊指何東舜銘欠債，跟妹妹十姑娘展開罵戰，引發雙方就澳娛股份發生爭拗，身為十姑娘兒子的何東舜銘突然自爆，指自己是母親和何鴻章的私生子，而何鴻章也公開承認何東舜銘是其兒子，其後何東舜銘把麥的姓氏，改為何東，認祖歸宗。
冇見十姑娘
以下是本報記者電話訪問何鴻章的內容：
記：記者 何：何鴻章
記：陳復生同你個仔何東舜銘傳上個月離婚？
何：佢唔係我個仔！（語氣決絕，斬釘截鐵）你問佢老母佢係邊個個仔！……我又冇驗DNA，話總統個仔都得o架啦！你聽佢噏啦！
記：同何東舜銘有冇聯絡？
何：冇聯絡，我唔識佢！
記：有冇同何東舜銘見面？
何：有同佢見過面，但我唔識佢，亦冇來往。
記：知唔知佢同陳復生離婚？
何：有聽聞，陳復生話佢老公唔理冇畀錢養細蚊仔，話佢係個唔負責任老竇。
記：有冇叫十姑娘教個仔？
何：我好耐冇見佢（十姑娘）。
記：只係同陳復生聯絡？
何：我都冇同陳復生聯絡。
記：但你又話陳復生話何東舜銘唔畀錢養一對子女？
何：人哋傳，世界咁細聽番嚟。
記：有冇聽聞佢哋部分物業被暫緩註冊（釘契）？
何：呢啲嘢可以改嘅啫！總之我唔識Michael Mak （何東舜銘英文名，之前的姓氏為麥）呢個人。
記：你好似好唔鍾意何東舜銘？
何：總之我唔識呢個人。
冇驗DNA
記：點解突然間唔認佢係你個仔？
何：我冇驗DNA。（這句重複數次）
記：但Michael同賭王罵戰時你好支持佢？
何：當時我Support（支持）佢係可憐佢。
記：佢唔畀錢養細路仔係咪有原因？
何：我點知點解唔養仔女，可能佢癲咗。
記：佢離婚原因係咪因為女人？
何：我點知佢（出面）有幾多個女人，總之我哋冇來往。
記：有冇探賭王？
何：賭王大把人照顧佢。
記：有冇同何家嘅人聯絡？
何：冇！我淨係同我啲仔。
與太太長期在英國生活的何鴻章，自言剛返港，談話期間，記者一直聽到他不斷咳嗽，不過他表示只是「嗆」親！