城　城 ：你會唔會買飛入場睇《風雲Ⅱ》？

小小So ：……會。（猶豫咗一陣純屬自然反應，因為見城城好認真咁問，所以唔想隨口答。）

城　城 ：我拍完都未睇過，所以好想快啲睇，我連去邊度睇都已經諗好晒。

小小So ：但聖誕檔期好多猛片，好似占士金馬倫嗰套《阿凡達》都好多人談論。

城　城 ： 《阿凡達》有占士金馬倫，我哋都有金馬倫道！

小小So一時搭唔上嘴，因為大腦正全力思考城城呢句說話背後係有咩特殊含意，但最後都放棄咗，只用微笑以示對城城嘅支持，同埋對城城重視小小So呢位聽眾先搞Gag嘅一種答謝。一個藝人要成功，背後有好多因素，其中一種叫自信，呢一刻喺城城身上，小小So見到一個藝人嘅成功示範。