張美妮日前為代言的收身品牌拍攝廣告硬照，以八個性感造型上陣，當中包括比堅尼泳裝、背心熱褲、性感短裙及低胸晚裝等，其中一襲低胸吊帶裙，令美妮拋出「湯碗胸」，勁騷本錢。

美妮表示為拍攝這個廣告，不惜兩個月前開始Keep Fit，她說：「其實兩個月前已經冇畀飽飯自己食，以前我有一百零五磅，依家減咗10磅，成功收身，係人生有史以來最瘦嘅時候，身邊好多朋友都話我瘦啲成熟啲。（瘦咗有冇多咗追求者？）呢排都多咗啲桃花，有兩個男人向我表示有好感，不過我覺得唔係嗰種感覺，所以冇一齊，但係有人追，自信當然提升咗。」

鍾情浪漫靚仔

問到家人有否催拍拖？美妮說：「佢哋知我催唔到，呢啲嘢緣分到就會嚟，所以佢哋催我儲錢買樓多過拍拖。（有咩擇偶條件？）我鍾意浪漫型，唔需要有錢，事業穩定就夠，最好少少靚仔，畀到我浪漫嘅感覺。」

此外，美妮透露今次是以六位數字酬勞拍廣告，更揚言會將賺來的錢儲起作買樓之用：「酬勞好滿意，嚟緊我準備買樓，所以呢筆錢會儲起。（打算買咩樓？）冇打算買豪宅，都係諗住由細屋開始。」