容祖兒、何韻詩、G.E.M.、方大同和農夫等昨日出席頒獎禮拉票活動，眾歌手施展渾身解數以天才表演拉票。祖兒以一身聖誕樹造型現身，更處女下海以結他自彈自唱，贏得不少掌聲，她更笑說：「何韻詩，你行埋一邊啦！」

台下的祖兒（左）與何韻詩頻頻咬耳仔，老友鬼鬼！

G.E.M.（左）和祖兒大鬥跳繩，最終打成平手。

扮演勾心鬥角

阿詩則拉埋楊千嬅及祖兒落水，齊齊上演樂壇版《宮心計》，阿詩說：「樂壇咁多是非，歌手鬥爭名利搞不和，佢哋唔鍾意我，我又唔鍾意佢，我要表演勾心鬥角！」說畢阿詩即作狀狂摑千嬅，再用力搣祖兒手臂，更說：「死妹釘，你想攞我名銜？我同你講，你冇得同我鬥，我要縫住你個嘴！」

單手撐地的何韻詩，在農夫及祖兒協助下表演。

在拉票環節中，at17以13票先拔頭籌。

雖然阿詩扮演的「金鈴」明恰「三好」祖兒，但接受訪問時卻力撐好友會得獎：「我睇好祖兒，無論實力定勤力都做得好好，主觀同客觀都睇好佢啦！」祖兒則笑說：「佢唔投我可以投邊個？我積落咁多年陰德，點都應該畀幾分薄面我啦！不過，我都睇好阿詩，好難得樂壇仲有佢咁樣一顆赤子之心。」

為好友托大腳

阿詩對祖兒先爭後撐，到歌手互選時，她們都互投一票兼咬耳仔。而當阿詩表演瞓地提腿時，祖兒即出手為對方「托大腳」！其後在鬥跳繩環節中，祖兒除鞋露豹紋襪，阿詩便幫她除褸，老友鬼鬼。此外，祖兒昨晚出席東亞運動會開幕，她透露活動在船上舉行，消瘦不少的她擔心被大風吹落海！