史上畫功最差的兩位模鍾蕙芝（Lavina）及胡心諾（Rainbow），齊齊挑戰「友畫你」，二人各出奇謀，實行以核突畫功，令對手無所適從！首先由Rainbow出題，她畫了一個「單眼怪獸」，更求其地畫了一個向上指的箭嘴，原來謎底是「人望高處」！Lavina自然不明所以，令自鳴得意的Rainbow大派貼士，Lavina才靈機一觸猜到答案！
Lavina見Rainbow出口相讓，即出了一條簡單不過的題目，雖然她畫了一個核突的鐘及袋，不過Rainbow很快便猜中謎底是「時代廣場」。Lavina不禁寸她：「唓！好叻咩！」Rainbow果真不禮讓地說：「我真係好叻o架！下一題你一定估唔到！」她竟出題「格仔裙最迷人」，Lavina見6字題目已心慌慌，再見其抽象派畫作更是頭昏腦脹，最後只能猜得「格仔裙X迷人」，並投降認輸：「Rainbow，你係咪有問題呀？」
奸計得逞 邊畫邊笑
不能再輸的Lavina以6字題目反擊Rainbow，見她邊畫邊笑，還喃喃自語說：「呢題你估到都唔會好過！」只見她畫了一個湖及一個大問號，Rainbow竟估中：「你係咪想話『胡心諾有問題』呀？」Lavina即拍案奸笑，不過遊戲規定參賽者要親自寫上答案，Rainbow惟有死死氣地寫出答案，不過她把「有」字改作「冇」，令Lavina笑到肚攣！
打死不離好姊妹
雖然玩遊戲時二人大玩攻心計，不過Lavina與Rainbow仍是一對不折不扣的好姊妹！當一起揀衫預備時，Lavina不時提點Rainbow注意走光，Rainbow則為Lavina走入廁所裝身，同聲同氣，親如姊妹，還互讚畫功了得，但如此畫功，並非人人都讚得出口！