溫碧霞（Irene）嫁咗畀金融才俊何祖光之後，一直過住豪門少奶嘅生活，得閒食幾千蚊一両嘅冬蟲草補身；心情好、心情唔好又會走去狂買衫，一日買成五十萬靚衫都面不改容；又試過突然Mood到，就搭飛機去上海歎Spa，呢個隨心所欲嘅生活真係超爽。據知Irene早前又有新「力作」，聽佢閨中密友話Irene最近鍾意咗買幾十萬嘅首飾嚟襯衫。
小小So：Irene最近鍾意買乜？
Irene密友：買鑽飾囉！
小小So：點解買鑽飾？
Irene密友：佢買嘢冇目的㗎，鍾意咪買。嗰日同佢行街，咁啱行過珠寶店，咁得閒咪睇吓囉，點知又挑起佢嘅購物欲。
小小So：咁佢買咗乜？
Irene密友：買咗骷髏頭戒指，大約十幾萬蚊，成個骷髏都鑲滿鑽石，真係幾閃！
小小So：買嚟去Ball㗎？
Irene密友：唔係，佢話攞嚟襯衫！佢同佢老公都咁有錢，Irene話十幾萬鑽飾用嚟襯衫都差唔多，佢話呢款飾物，仲可以用嚟去聖誕節派對，但去大Ball戴十幾萬首飾，Irene怕畀人笑寒酸，上流闊太生活係咁奢侈㗎啦！