昨晚舉行的《萬千星輝頒獎典禮2009》中，一班女藝人為求搶鏡，除了騷胸鬥性感及鬥行頭外，驚嚇造型同樣能成功「出位」！向來形象百變的汪明荃貫徹其「迷人Pink Lady」本色，以粉紅色的「孔雀開屏」圖案短裙出場，可惜裙款古怪，全身更包到冚，未知是否因上次在台慶上失守，而刻意收埋「海膽」？與別不同的阿姐，還以「零行頭」上陣，對造型信心十足：「今次係玩前衞，呢件衫如果仲戴首飾，就會好不倫不類！」

阿姐化身粉紅色孔雀兼玩「開屏」，夠晒搶鏡！	邵美琪Set了爆炸頭，老氣橫秋！	胡杏兒穿上彩色豹紋晚裝，論盡兼冇睇頭！ Blumarine長裙（4萬港元）周大福贊助首飾（約700萬港元）

至於阿姐的「新抱仔」胡杏兒亦「不遑多讓」，穿上彩色豹紋晚裝上陣，毫無睇頭之餘，裙款前面是一長一短，略為論盡！頒獎禮上，杏兒坐在阿姐後面，同樣造型奇特，相映成趣！問到為何選擇這個造型出場？杏兒解釋：「唔係成日都要性感嘅，出年先啦！同埋好少有彩色豹紋㗎！」

邵美琪爆炸頭賣老

另外，自稱行「型格」路線的鍾嘉欣，穿上一件貼滿水晶的上衣，但配上大熱的PAGODA SHOULDER巨型墊膊，騎呢「膊出位」，加上類似「蜂巢」髮型，美感欠奉，與一貫的清純造型大相逕庭。而特別Set了爆炸頭的邵美琪顯得略為老氣，更被打扮性感的前輩韓馬利及謝雪心比下去，認真失策！