新一代舞王陳偉霆今年事業運強勁，密密做到冇停手，帶挈荷包進帳不少。但最近有指William與Angelababy因聚少離多，令戀情告急，加上Baby被傳搭上型男黃曉明，令分手之說甚囂塵上！日前William到銅鑼灣的Energie狂掃男裝減壓，專攻長褲及外套的他，狂試多款服裝兼在鏡前左照右照，認真貪靚！

倒瀉籮蟹 William不慎掃跌放在架上的外套，倒瀉籮蟹。	靚女傍實 William購買力驚人，難怪女售貨員傍實。	左照右照 姿整的William在鏡前左拼右襯，難道唔怕照爆鏡？

五位數掃貨

期間William脫去外套放在架上，並一次過拿起多件外套及褲子，但不慎掃跌放在架上的外套，認真失魂！挑選了幾件心頭好的他，挽着兩袋戰利品滿足地離開。據悉William豪花五位數字血拚：「我一係唔買，買嘅話有時都幾瘋狂！呢排工作日夜顛倒，好大壓力！（大豐收？）今年秋冬開季以來，第一次買衫，所以大出血都冇所謂！（唔揀女裝？）唔識買禮物送畀異性朋友，寧願問清楚佢哋要乜先去睇，費事買咗唔啱用！」

大袋細袋 William收穫甚豐，手挽兩袋戰利品離開。

疏爽磅水 William豪擲五位數置裝，可見吸金能力強勁。

此外，有傳搭上黃曉明的Baby強調，他倆只見過對方一次，問到是否唱K的那一次？Baby沒有正面回應：「嗰次係交際應酬，大家只係點頭！（唔見咗兩個鐘？）冇咁嘅事！（同曉明有機會發展？）冇可能！我哋只係見過一次，唔知點解會傳出嚟？」至於曉明則透過經理人表示，對報道不作回應。