纖體公司代言人經常為飲食而煩惱，兼好好保持身材，但係蔡卓妍（阿Sa）並冇因為擔任纖體公司代言人而食少啲，反而去到邊食到邊！小小So經常撞到阿Sa食緊嘢，唔通有纖體公司呢個後台就可以係咁食？最近小小So見到阿Sa，就行埋去同佢打吓招呼，仲睇到佢隻戒指好鬼靚，原來佢隻戒指都係同食嘢有關！
小小So：你隻戒指好靚呀，邊個送㗎？
阿 Sa︰隻戒指係我自己買㗎！助手同化妝師都有一隻同款唔同色。因為我哋一出街就係咁掃嘢食，好似蝗蟲咁食唔停，所以我哋被封為「蝗蟲三人組」！所以買隻戒指做紀念！我係蝗蟲一號，所以戴金色！
小小So：隻戒指咁多閃石，係咪好貴？
阿 Sa︰其實隻戒指好平，幾百蚊就有一隻。我覺得好靚，價錢唔係最重要，最重要係友誼！
貴為天后級嘅阿Sa毫無架子，雖然已經係圈中嘅小富婆，但唔一定要買名牌，小小嘅首飾已經氹得佢鬼咁開心，真係開心果一名！