曾講過不想入娛樂圈的謝婷婷，始終擺脫不到演藝世家之名，步父母謝賢（四哥）與狄波拉、哥哥謝霆鋒及阿嫂張栢芝後塵，昨日正式簽約王晶旗下的影王朝，成為新一代晶女郎！除了四哥與拉姑外，不少世叔伯如陳百祥、張耀榮、查小欣及好友欣宜均來撐場，為婷婷入行打下強心針！

栢芝搭髀分享經歷

雖然群星拱照，但婷婷也未敢怠慢，穿上一襲Deep V短裙大開中門，看來對入娛樂圈信心十足，她說：「簽呢間公司對我好重要，代表我以後嘅發展路向。簽王晶公司同屋企一樣，畀到父母同我一份安全感！」王晶對婷婷這位新一代「晶女郎」愛護有加，全程傍實。

問到曾講過不會入行，婷婷說：「其實係天意，我用咗五年時間考慮！」她又表示霆鋒曾反對她入行：「佢驚我要捱，但係哥哥都要捱，錫我當然唔贊成我辛苦！（霆鋒同安志杰冇撐場？）佢哋要拍戲！男友都有SMS鼓勵我，叫我要自信啲！」婷婷指栢芝因腹大便便未能到場：「不過佢有搭住我大髀講鼓勵說話，同我分享拍戲經驗！」

問到可希望與男友合作？恨到口水流的婷婷說：「都想，因為佢拍戲真係好有經驗同好有Talent！」不過，老闆王晶卻極力反對他們情侶檔合作，他說：「我一向都唔贊成情侶檔，就算觀眾都唔鍾意，但有適合劇本都會搵佢（安志杰）！」

以往的「晶女郎」形象性感，問到婷婷會否拍暴露戲？她說：「性感都可以係型嘅一種，每個女人都有自己Guideline，但一定唔可以唔着衫，因為全裸可搵替身。」自爆簽了3年約的婷婷還表示，希望可在電影界及模界兩棲發展。