年僅二十二歲的江若琳(Elanne)入行三年,在短短的日子已拍了多套電影和電視劇,歌、影、視三忙的她可算是多產藝人。她先後拍過《愛鬥大》、《關人7事》及《同門》外,最近又推出新唱片《Show You》,不過Elanne自言愈多工作愈開心,就讓她與讀者分享一下入行後的「十大之最」!
最難忘的一場戲
「應該係《關人7事》裏面個Ending,因為講我要死喺車多人多嘅英皇道,工作人員為咗呢幕戲封咗條街,我覺得死得好轟烈,好威,未曾試過咁大陣仗!」
最瘋狂的Fans
「記得有次去內地拍劇,有幾個女Fans專登喺好遠嚟入住我住嗰間酒店,仲Book埋隔籬房,佢哋好好,有時『攝』張紙仔入嚟話買咗蛋糕畀我食,一時又煲綠豆沙畀我食,真係估唔到原來內地我都有Fans!」
最合拍對手
「我覺得同吳卓羲合作最有火花,拍《學警狙擊》嗰時佢好照顧我,可能我第一次拍劇,佢教識我好多嘢,同埋大家都好夾,令我拍嘅時候好舒服好自然。」
最能表達心情的一首歌
「我梗係賣廣告話係我嘅新歌《Show You》啦!因為我咁耐唔喺香港,我希望好似其中一句歌詞咁,話畀所有愛我嘅人聽,『I will promise to show you show you all my love!』」
最(火羅)的經歷
「我記得有一次做訪問影相,Stylist準備咗袋衫畀我,咁佢冇講明要點着,我見有條Leggings、紅色Tee同件斗篷就照常咁着啦!不過都覺得有啲怪,因為淨係着條Leggings現晒個Pat形出嚟,咁心諗款嚟嘅!所以就二話不說照着可也,仲好開心擺晒甫士影相,點知後來個Stylist睇番,原來嗰件唔係斗篷,係半截裙嚟o架!真係勁(火羅)!」
最大膽的一次
「識我嘅人都知我好細膽,以前出Trip住酒店都要人陪,連沖涼我都要助手坐喺廁所等我,不過最近我返內地拍劇,我要求要自己一間房,因為我已經訓練到自己唔驚,習慣晒!」
最令我大開眼界
「一定係電視台嘅布景,佢哋可以幾日就搭起一間屋,一個Office,仲可以整到屋外落雨,由細到大睇電視都係以為啲屋係借嘅,依家先知原來全部都係搭出嚟,勁!」
最大的挫敗
「其實我簽約之後唔係即刻有工作,嗰段時間聽到好多冷言冷語,有人會話我唱歌唔好做戲唔掂,不過因為唔服輸嘅性格,令我一定要畀人睇到自己嘅進步,所以先有今日嘅我。」
最唔想畀人標籤我
「花瓶同玉女啦!因為我覺得咁樣好唔公平,一畀人咁講就會好似咩都唔識,抹殺晒我所有努力,所以我係唔怕豁出去,要我唔化妝或者做咩核突角色都冇問題,唔想畀人框死咗我嘅潛力。」
最想達到的目標
「其實目前為止,始終都係最想買間屋等屋企人可以住得舒服啲,想快啲可以成為屋企嘅經濟支柱,有時見媽咪一早出咗去返工到好夜先返,好想佢可以唔使做嘢咁辛苦。」
後記:精力無窮
平日跳跳紮的Elanne,在訪問期間嘴裏不是在吃糖,就是在哼歌,看到自己的MV在電視上播放時,又突然大叫怕醜,更指着電視螢光幕笑說好憎「呢個人」,古靈精怪的她好像擁有用不完的精力,認真是活躍度爆燈!
擇偶心理測驗
開到口表示恨拍拖的Elanne,究竟會被哪一類的男士吸引?
問題:眼前有五杯色彩繽紛的酒,你會選擇哪一杯?
A.黑色
B.紅色
C.綠色
D.紫色
E.藍色
解說:多心的Elanne表示自己又愛紅色又愛紫色,代表她要求多多,紅色表示追求外表吸引的男性,而紫色表示希望尋找經濟上能依靠的男性,追求優質的生活。
其他答案選擇:
黑色: 追求穩重,可靠及父親型的男性。
綠色 :希望尋找擅於處理人際關係的男性。
藍色 :追求知性的男性,希望對方知識豐富,可教曉自己任何事。