任達華（華哥）、琦琦及黃宇詩昨日出席聖誕活動，最近忙於拍攝由米高賓執導新片《Blood Bond》的華哥透露，因趕拍戲以致睡眠不足兼聲音沙啞：「我拍緊西片，拍咗4晚通宵，要搽到好污糟，喺森林着嗰件衫又唔洗得，成兩個月冇洗，只可以用酒精抹吓！我喺森林冇蚊叮又冇烏蠅摟我，太臭喇！佢哋都嫌棄我，飛埋嚟都臭到走晒啦！」琦琦不禁笑說：「佢日日沖涼都要用成半支沖涼液㗎！」

華哥與琦琦玩巨型棋，童心未泯！

華哥一家三口經常四處旅行，樂也融融！ 資料圖片

日本歡度聖誕

華哥表示已拍罷該片，聖誕節有假期陪囡囡晴佳，琦琦亦已計劃與囡囡到日本旅行：「我訂咗日本迪士尼一間灰姑娘房畀囡囡，今次係同佢啲同學仔一齊去！」可惜華哥未必能夠同行。他們每年都會在家中布置聖誕燈飾，還會把禮物放入聖誕襪內。琦琦說：「老公已經買咗聖誕禮物畀囡囡，係一架好大嘅飛機，我哋一家人會交換禮物。」

華哥及琦琦閒時會與囡囡玩飛行棋，輸家更需罰企，華哥說：「要畀囡囡輸吓，等佢知道唔係咩都係應得嘅！有時我要做岳飛，畀個背脊佢寫字！」