港姐「咪神」徐淑敏暫時收山嫁人，令唔少宅男心傷，好彩08年落選港姐高海寧「谷住」上位，近幾次活動都勁谷35E咪咪，火速成為新一代「咪霸」！早前小小So八卦問高海寧有咩豐胸心得，佢笑晒口話係天生，早前一班被指「打假波」嘅亞姐真係望塵莫及！
小小So ：啲人話你係新一代「咪霸」，點解你身材咁好？
高海寧：哈哈，多謝晒！係天生㗎！我諗係家族遺傳，其實唔止我，媽咪、姨媽、表妹個個身材都咁好。
小小So ：係咪同長大地方有關？
高海寧：我喺南京長大，唔知同水質有冇關係呢？但發育時期，我好鍾意飲牛奶，每日起碼飲一杯，有時仲會食芝士。
小小So ：人氣升咗，係咪搵多咗錢？
高海寧：少少啦！不過可以再忙啲，早前拍咗部電影《美麗密令》，希望遲啲可以再拍多啲劇集同電影。
小小So ：你嘅廣東話好似進步咗好多，冇晒啲鄉音。
高海寧：係呀！我經常咬住木塞讀報紙，雖然好攰，但真係幾有效，加上最近跟老師學唱歌，教我無論說話或唱歌嘴形都要大啲，懶音、鄉音乜都冇埋！