二月二十四日出生、雙魚座的伍詠薇（伍姑娘），89年參選《亞洲小姐》時雖勇奪得「最上鏡小姐」，但她從未借獎項在事業上衝刺，反而選擇全情投入談情說愛，更於翌年卸任後即下嫁比她年長三十年的翁江培。她說：「我由十二歲開始就愛情至上，冇愛情就咩都做唔到，真係手停口停！」
獎項當錦上添花
以愛情作生活動力的她，求學時期更因冇拖拍而拖累成績。但她經歷數次感情波折後，終於十年前找到生命中的另一半練海棠，每當提起老公，她均笑到見牙唔見眼：「我生命中得到晒喇！事業上嘅發展係錦上添花，如果攞獎就係錦上添花嘅錦上添花！不過我好樂觀，唔會鑽牛角尖，事業上，我會繼續努力享受過程！」
至於同樣於二月二十四日出生、雙魚座的陳法拉，自2005年當選《國際華裔小姐》亞軍後，事業平步青雲，早前更擊敗不少對手成為「Laughing嫂」，從公仔箱殺入大銀幕，她說：「拍拖係私人事！緋聞同拍拖會影響到自己，我咁辛苦拍劇，但傳媒只着重緋聞，我唔想Focus喺第二度！所以我明白藝人結婚唔講出嚟，始終各人有自己嘅處理方法，有權保密！」
不介意公開戀情
法拉認為拍拖不會影響事業，但不想過度宣傳緋聞：「拍拖係拍拖，工作係工作，唔想將兩樣嘢混為一談！」雖然她絕口不提感情事，但她坦言工作之外，亦需要愛情滋潤：「拍拖對我嚟講都係需要！因為我單身一個人喺香港打拚，父母都唔喺身邊，生活同感情要取得平衡！（公開戀情？）感情唔係一個人嘅事！如果係圈中人，就更加係兩個人嘅事！只要另一半同意，我唔介意公開！（叫伍姑娘介紹筍盤畀你？）冇呀！隨緣啦！呢啲嘢講機緣巧合，我拍劇好忙，都冇時間諗！」
工作充塞生活
在沒有感情寄託下，法拉要取得平衡，惟有在工作中尋找滿足感：「以前讀書嗰陣放假會行街同睇戲，返香港做嘢咁多年，我連Joyce喺邊都唔知！唔使開工我會留喺屋企睇電視同睇書，參考吓人哋點演戲！」對於法拉專心搏殺事業，伍姑娘大表欣賞，更大讚她是個相當有計劃的女生。
閱歷豐富角色
伍姑娘入行快將二十年，對娛樂圈感觸良多：「睇到唔少人加入娛樂圈，同時又睇到唔少人銷聲匿迹，有啲前輩以前睇電視先會見到，估唔到依家有機會合作！」問到在事業上還有甚麼目標，她說：「以前好多角色做唔到，依家人生經歷豐富咗，可以深入揣摩角色，所以我會享受演戲過程！」