電影《十月圍城》台前幕後包括黎明、甄子丹、范冰冰、監製陳可辛及導演陳德森結伴出席《聖誕心花放@海港城─聖誕亮燈儀式》並擔任亮燈儀式特別嘉賓。聖誕節將至，黎明說：「完成呢個電影宣傳，喺美國有演唱會。（太太一齊去？）佢好似另外有嘢做，好似會返去探屋企人，地方唔同，仲有時間，到時先決定。」因樂基兒的家人在美國，故黎明此話似預告兩人將一同在美國過聖誕兼探望外父外母，及後記者問到買甚麼禮物，黎明又即金句王上身：「唔諗呢啲住，我唔會答啲行貨對白，費事諗。」

另外，樂基兒早前穿上女僕衫被指肚凸凸，其經理人公司發言人說：「邊個着件衫都凸，咁窄。（咁佢係咪大肚？）唔知，佢冇同我講，佢停工前仲有4、5個工作，跟住會返美國，一月中先返香港。」

范冰冰嘆冇人陪

同場的范冰冰則以一身Valentino晚裝出席亮燈儀式，她坦言過往也曾在香港過聖誕，但都是為了工作，加上她在香港的朋友全有另一半，根本沒有機會一起慶祝。至於甄子丹則表示聖誕節要赴內地開工，故會買禮物氹太太。