驛馬星動的古巨基，日前到青島出席一個大型歌迷互動會，萬名歌迷四方八面湧到廣場，場面墟冚！基仔在多名保安護送下現身，歌迷即報以熱烈歡呼聲，基仔笑說：「個活動喺早上九點舉行，我都係第一次咁早唱歌，凌晨五點就要起身梳洗、開聲。」基仔得知有歌迷緊張到通宵不眠，天濛光即湧到廣場等候，令他感動不已。
當地歌迷十分瘋狂，當知道遊戲環節開始時，場面即失控，不少歌迷趁機爬上舞台，基仔來不及呼籲大家注意安全，已被爬上台的歌迷嚇了一跳。基仔笑說：「見到成萬人企晒喺度，大家又一齊大合唱，感覺真係好High，好好玩。」
此外，對於湖南衞視計劃重拍《還珠格格》，曾經飾演「五阿哥」的基仔笑言要做男版「小燕子」，他笑說：「我嗰時已經將最好一面做畀大家睇，如果再畀次機會我，咁我諗我想做小燕子。」談到其新歌《沒有腳的小鳥》，他說：「近日我不停咁飛，遲啲仲要飛瀋陽、天津、鄭州同濟南等等，同首歌應晒景，真係一隻冇腳雀仔。」