日前郭富城開腔向正印城嫂Lynn派定心丸，直指Mango諗多咗，Lynn隨即濕髮闖城一小時。昨晚Lynn與Mango分別出席《蘭桂坊嘉年華2009》以及《庭恩兒童中心》慈善晚宴，前者以向來「天氣好好」來形容與城城關係，而奪城失敗的Mango惟有祝福二人。Lynn身穿密實窄身裙，帶着黑眼圈，問到與城城共處的一小時做了甚麼﹖她怕醜地說：「唔回應，唔好諗咁多。（回來就攻城，好掛住對方？）我都係唔回應。（佢好掛住你？）我諗唔到點答。（會唔會繼續去佢屋企﹖）遲啲先啦！」

Lynn、謝婷婷和劉晨芝等昨晚出席嘉年華活動。

Mango表示不想隔空罵戰，並大方祝福Lynn和城城。

記者指城城向她派定心丸，Lynn堅稱根本冇事發生，對於城城指Mango諗多咗，她貫徹低調作風：「佢已經回應咗，我冇嘢回應。（城城代你出頭。）我冇呢個感覺。」她稱與城城是好朋友關係，當問到會否覺得雨過天青時，她風騷地說：「不嬲天氣都好好。（勝利者感覺？）今晚氣氛好好。」

「祝福佢哋」

另一邊廂的Mango對於Lynn闖城一小時，她直言沒看報道，提到城城與Lynn感情愈來愈好，她認真地說：「都唔關我事。（有冇上過城城屋企﹖）唔講。（想劃清界線？）唔好用呢啲字眼，我冇講。」她謂不想隔空罵戰，想停止戰爭，記者指城城與Lynn二打一，她即反問：「乜嘢二打一？打機呀？係大家諗多咗。」問到知道Lynn闖城後會否酸溜溜？她直言不開心只是因為別人對她有誤會，與二人無關，問會否祝福他們時，Mango爽快地說：「會祝福佢哋。」